Días de hospital

En algunha outra ocasión xa vos falei da escola infantil na que estudan os meus fillos. Trátase dun centro que recomendaría a calquera cos ollos pechados e na que estou segura de que aínda nos quedan moitas experiencias fermosas por vivir. En Arela escollen cada ano unha temática na que se centran (obviamente, non de xeito exclusivo) e este ano o centro convertiuse nunha cidade e cada aula é un punto importante, un edificio significativo. Por eses paradoxos que ten a vida, a aula de Sabela é o hospital, edificios nos que temos vivido moitas experiencias de todo tipo.

Como sempre, tento achegar aos meus fill@s á realidade e á aprendizaxe dunha forma lúdica e educativa. De aí que leve unha temporada buscando e traballando con material lúdico-sanitario. O primeiro foi un hospital de cartón que fixen nuns seis ou sete minutos, cunha caixa, papel, celo, pinturas e unhas tesoiras.

A miña inspiración (que me supera, por suposto) podedes atopala aquí.

Os outros materiais que elaborei son uns lotos, recortables e puzzles (iso déixoo para dentro duns días) que descarguei dunha web na que veño de darme de alta e na que podes mercar distintos materiais elaborados por profes norteamericans. Recoméndovos que lle botedes unha ollada: Teacher's notebook.

A parte mala sempre vén dada pola realidade e é que hoxe mesmo tivemos unha experiencia hospitalaria máis da lista que acumula Sabela. En realidade era urxente e non quedaba outro remedio, é máis, hai semanas que agardabamos que sucedese, sobre todo porque a opción era que a nosa filla soportase todos os días unhas dores de moas horrorosas. Agora toca descansar un par de días despois dunhas semanas nas que tiven o blog abandonado pola falta de sono, os agobios, o ibuprofeno, o nolotil e o paracetamol... Máis temas sanitarios non, por favor!